Facebook spurningar

Íslensk fyrirtæki eru farin að prófa sig áfram með Facebook Questions þjónustuna.

Eitt dæmi er þessi skoðanakönnun sem Tónlist.is sendi í gegnum þjónustuna í dag.

Questions þjónustan er að hluta til svar Facebook við leiðtoganum í gáfulegum netspurningum, vefsíðunni Quora.

---

Quora er spurningarþjónusta sem fékk gríðarlega aðsókn á síðustu mánuðum síðasta árs en virðist nú vera sem næsta horfin úr umræðunni Vestan hafs.

Qoura var stofnað af fyrrum skólafélaga Mark Zuckerberg, Adam D'Angelo sem vann með honum að Facebook.

Ég get alveg gleymt mér inni á Quora þegar ég á annað borð man eftir síðunni. Hún gefur miklu betri svör en Google nokkurn tímann.

Enda er það oft klárasta fólkið í ákveðnum geirum sem svarað hefur spurningum þar inni.

---

Það verður spennandi að sjá hver þróunin verður með ýmsar nýjar þjónustur sem Facebook hefur sett í loftið undanfarið, s.s. eins og staðsetningarþjónustuna Facebook Places sem keppir beint við þjónustur eins og Foursquare og Gowalla. 

Stóra spurningin er hvort að það kvertatak sem Zuckerberg hefur á tengslaneti okkar (social graph) dugi honum til að sigra nýjar og sprækar sjálfstæðar síður (eins og Quora, Twitter og Foursquare) í keppni um ólík samskiptaform okkar á netinu.

Fíton flytur í Kaaber-húsið

Auglýsingastofan Fíton sem nú er við Garðastræti flytur í eitt flottasta húsnæði í Reykjavík í júlí næstkomandi - Kaaber-húsið við Sæbraut.

Með því sameinar Fíton ýmsa starfsemi sína undir einu þaki, þ.m.t. birtingafyrirtækið Auglýsingamiðlun, framleiðslufyrirtækið Miðstræti og vefsíðufyrirtækið Atómstöðina.

---

Húsið er í eigu bandaríska fjárfestisins Michaels Jenkins. Þeim hinum sama og hefur verið að kaupa upp góðar fasteignir víða á höfuðborgarsvæðinu og lánað hefur til reksturs Fréttatímans.

Fréttatíminn mun að öllum líkindum líka flytja í Kaaber-húsið þó að það sé ekki endanlega frágengið.

 Gluggarnir eru ekkert smá flottir og útsýni yfir sundin blá.

Vonandi verður þessi vörulyfta þarna áfram í óbreyttri  mynd.

Framkvæmdir voru í fullum gangi þegar við litum við.

Húsið er á þremur hæðum. Hátt er til lofts á jarðhæðinni og það verður gaman að koma í þetta hús þegar allir verða fluttir inn og búnir að fá sitt pláss.

Sannkallað hús hinna skapandi greina.

Auglýsing sem heiðrar The King's Speech

Vinir okkar í Vatíkaninu voru að framleiða þessa flottu sjónvarpsauglýsingu fyrir prótíndrykkinn Hámark.

---

Tilkynningaskyldan: Góð samskipti hefur unnið nokkur verkefni fyrir Vífilfell í gegnum tíðina.

Almannatengill: Næstmest stressandi starf í heimi

Í síðustu viku var kynnt ný könnun um hvaða störf fælu í sér mest stress allra starfsgreina.

Í fyrsta sæti voru flugmenn. En fast á hæla þeirra, í öðru sætinu, komum við almannatenglarnir.

Jasso!

Í öðru og þriðja starfi yfir þau störf sem búa við minnst stress eru forritarar og tölvunarfræðingar. Ég er ekki viss um að þeir séu allir sammála því sem ég þekki og eru í þeim störfum hér á Íslandi.

---

Það má svo sem deila um þetta val. Það eru margir kostir við þetta starf sem við almannatenglarnir höfum valið okkur.

En líklega er það viss ábending um að álagið sé mikið þegar fólk neyðist til að koma sér upp sektarkerfi fyrir að tala um tímaleysi og álag. 

Þetta urðum við að gera hjá Góðum samskiptum svo að við gætum betur notið vinnunar og værum ekki allan daginn með fókusinn á hinu neikvæða við starfið.

 

---

Það er vefsíðan Careercast.com sem framkvæmir þessa könnun á stressi innan ólíkra starfsgreina.

Hins vegar þegar listinn yfir 200 bestu störfin skv. sömu síðu er skoðaður kemur í ljós að starf almannatengilsins er ekki talið sérstaklega eftirsóknarvert. Þar er það í 133. sæti, einu sæti neðar en starf lyftaramanns.

Aumingjans blaðamennirnir eru svo í 188. sæti yfir 200 bestu störfin.

Gott gabb og plögg

Ég skrifaði nýlega um skemmtilega og vel heppnaða pr-uppákomu hjá IKEA á öskudaginn.

Það er raftækjaverslunin Elko sem fær hrósið að þessu sinni fyrir skemmtilegt aprílgabb.

Þeir settu í morgun inn plat-vöru vefverslunina sína. Svokallaða "skuldhreinsivél".

---

Sumir stjórnendur hefðu ekki þorað að gantast með svona heitt deilumál.

En það er oft þannig að þeir sem þora skora, þegar pr-stönt eru annars vegar.

Þetta er þegar farið að dreifa sér um vefinn (viral) og fjölmargir eru í leiðinni áminntir um að Elko rekur öfluga verslun á vefnum.

Vel gert!

Netagerð

Fólk hefur átt svolítið erfitt með að þýða enska orðið "networking" yfir á íslensku.

Algengasta þýðingin er "tengslamyndun".

Ég rak hins vegar augun í þessa þýðingu í fundarboði virðulegra samtaka í íslensku viðskiptalífi.

 

 Netagerð er kannski ekki sérlega þjált, en það er skemmtilegt. 

 

Þarfasti þjónninn

Sé að bloggarar eru að skrifa um símana sína í dag.

Fréttablaðið var með úttekt á farsímum um daginn og bað mig að segja stuttlega frá símanum mínum.

Það kom í ljós að ég hafði miklu meira að segja um þetta blessaða tæki en ég átti fyrirfram von á. Ég hélt satt að segja ekki að maður hefði svona miklar skoðanir, já og tilfinningar tengdar þessu tæki. Ég er áreiðanlega ekki einn um þetta. Ætli það megi ekki með réttu kalla farsímana "þarfasta þjóninn" í dag.

Hér eru svörin sem ég gaf í Frbl.

----

Hvernig farsíma átt þú? Nokia E71 – hvítan og silfurlitaðan (2 ára gamlan)

2.       Hverjir eru kostir símans? Hann er bæði fallegur og harðgerður. Sem er aðalsmerki Nokia og skiptir máli fyrir mig því ég missi símann nær daglega í gólfið, en hann hefur samt ekki látið mikið á sjá. ekki frekar en fyrri eintök af Nokia sem ég hef átt. Ég er mikill Nokia-maður. Nenni ekki að læra á Samsung eða Motorola stýrikerfi. Síminn er líka í þægilegri stærð og fer vel í hendi og vasa. Skjárinn og lyklaborðið eru hvoru tveggja í hæfilegri stærð þannig að maður sér vel til á skjáinn og auðvelt er að skrifa á lyklaborðið. Lyklaborðið er svokallað QWERTY-lyklaborð sem þýðir að það er með sömu uppsetningu og hefðbundið tölvu-lyklaborð. Það er einungis einn stafur á hverjum takka og það gerir það að verkum að fljótlegra er að skrifa sms og tölvupóst og að leita í símaskrá símans. Hugbúnaðurinn er Symbian S60 sem ég kann svo sem vel við og hefur reynst mér vel, þó að á tímum smartsíma eigi Symbian að teljast nær úreltur hugbúnaður. Helsti kosturinn er eins og áður sagði að maður er mjög fljótur að læra á Nokia-síma og þetta er sá besti sem ég hef kynnst hingað til. Síminn er orðinn 24 mánaða gamall og ætti í raun að vera kominn á síðasta söludag miðað við mikla notkun, ýmis óhöpp og venjulegan endingartíma farsíma. En það koma reglulega á markað Nokia-símar sem standast vel tímans tönn og yfirleitt gerir maður mistök með því að skipta yfir í nýju útgáfuna (í mínu tilfelli Nokia E72) því að þeim er oft breytt, að því er virðist bara til að breyta einhverju.

3.       Hverjir eru ókostir símans? Það virðist ekki vera nein skeiðklukka í honum. Skil ekki alveg afhverju það voru skeiðklukkur í öllum símum á sínum tíma, en núorðið er það hending. Svo er alls ekki nógu mikið af smáforritum (apps) í boði fyrir hann. En sem betur fer er ég með litla Dell-tölvu meðferðis þegar ég er á ferðinni og 3G pung til að komast hvar sem er á netið og í samband við forrit sem ég nota og eru hýst á netinu s.s. Basecamp, Highrise og fleiri slík.

4.       Hvað notarðu helst í símanum fyrir utan símhringingar? Fyrst og fremst tölvupóstinn en líka SMS í síauknum mæli. Ég nota myndavélina mikið  til að senda myndir beint í gegnum netið á myndabloggið mitt og til að safna hugmyndum eða nota sem myndir á glærur fyrir fyrirlestra. Svo fer maður auðvitað á netið. Ég les yfirleitt vefsíður í fullri stærð í símanum, en forðast mobile-útgáfurnar – þær eru eiginlega óþarfar þegar maður er með snjall-síma. Einnig nota ég Facebook í gegnum sérstakt smáforrit.

5.       Hvers vegna keyptirðu þennan tiltekna síma? Ég vildi síma sem hefði svipaða virkni og Blackberry-sími en ég hef alltaf verið mikill Nokia-maður. Nenni helst ekki að læra á Samsung eða Motorola stýrikerfi. Síminn þurfti að uppfylla helstu þarfir mínar í gegnum vinnudaginn, en ég er mikið á ferðinni og þarf alltaf að vera í góðu sambandi við umheiminn. iPhone var kominn á markað þegar ég keypti Nokia-símann, en mér fannst iPhone full dýr og óttaðist samhæfingarvandamál fyrir okkur sem erum ekki Makka-fólk.

6.       Hvaða síma gætirðu hugsað þér að fá næst? Ég er orðinn svolítið þreyttur á að bíða eftir að nýr vefhugbúnaður sé gefinn út fyrir Symbian kerfi Nokia. Þeir eru með allt niðrum sig á App-markaðnum. Ég hef verið að skoða HTC Android Vision með Qwerty lyklaborði. Mér finnst hann nokkuð spennandi.  Ef ég myndi yfirgefa Nokia þá hugsa að ég velji fremur Android síma heldur en iPhone. Eins og einhver benti á þá erum við núna á svipuðum stað með Android og iPhone og þegar að Windows kom fyrst á PC og valtaði yfir Macintosh. Android-stýrikerfið er opið fyrir alla síma og hann er því á svo gríðarstórum markaði í samanburði við iPhone hugbúnaðinn sem keyrir bara á símum frá Apple.

 

Ikea og túkallinn

Báðar sjónvarpsstöðvarnar fluttu jákvæða frétt frá IKEA-versluninni í kvöld.

Sjá hér og hér.

Fréttin rataði m.a.s. í "helstið" á báðum stöðvum.

Þetta sýnir að oft þarf ekki meira en gott hugmyndaflug til að búa til gott PR.

IKEA er fyrirtæki sem nýtir sér PR ekki síður en auglýsingar og hefur gert frá upphafi held ég.

---

Að bjóða upp á salkjöt og baunir fyrir túkall á sprengidaginn var bráðsnjallt.

Þarna leikur IKEA sér með gamla laglínu á skemmtilegan hátt þannig að fréttastjórarnir voru komnir með fyrirsögn um leið og þeir lásu fréttatilkynninguna.

Svo er þetta líka gert í þeirri vissu að allir fjölmiðlar þurftu að vera með einhverja létta frétt í dag sem tengdist saltkjötsáti.

Skólabókardæmi um gott pr-stönt.

 

Brýning Benedikts Erlingssonar

 

 

 

 

 

 

 

 

 

 

 

Ég hef, eins og fleiri, haft gaman af vikulegu spjalli umsjónarmanna morgunútvarpsins á Rás 2 við Benedikt Erlingsson þar sem þessi magnaði stórleikari lætur gamminn geysa um þjóðfélagsmálin og er fátt óviðkomandi.

Það er upplífgandi þegar að fleiri en stjórnmálamenn taka þátt í því að ákveða dagskrá þjóðmálaumræðunnar.

---

Í þættinum í morgun ræddi Benedikt Erlingsson m.a. um „kynningarfulltrúa“ og fjölmiðla.

Hafði hann nokkrar áhyggjur af þeim miklu áhrifum sem þessi stétt hefði.

Kom það honum m.a. mikið á óvart að til væru siðareglur fyrir þá til að fylgja. Það er því ástæða til að nota tækifærið og benda á þær hér.

Eitt mikilvægasta ákvæðið í siðareglunum kveður á um að almannatenglar virði í störfum sínum hagsmuni almennings.

Jafnframt er kveðið á um að almannatenglar veiti ekki vísvitandi villandi eða rangar upplýsingar.

---

Hjá Almannatengslafélagi Íslands (AÍ) hefur jafnframt verið starfandi siðanefnd, en það er synd að segja frá því að hún hefur ekki úrskurðað um eitt einasta kærumál á þeim áratug sem liðinn er frá því að hún tók til starfa.

Ég geri ekki ráð fyrir að verkefnaskortur siðanefndarinnar sé því um að kenna að almannatenglum eða upplýsingafulltrúum hafi ekki orðið neitt á í messunni í störfum sínum allan þennan tíma.

Sjálfur þykist ég raunar hafa séð dæmi um slíkt, bæði fyrir og eftir hrun.

En annað hvort er það vegna þess að ekki eru allir í stéttinni félagsmenn í Almannatengslafélaginu og því ekki seldir undir siðareglurnar.

Eða þá að þessi leið er ekki nógu vel kynnt fyrir þeim sem telja á sig hallað vegna vinnubragða félagsmanna okkar.

---

Ég tel, sem formaður félagsins, æskilegt að allir sem starfa við almannatengsl séu í AÍ og undirgangist siðareglur þess.

Ég myndi jafnframt fagna því ef að siðanefndin fengi mál til að úrskurða um. Ég tel að það yrði til þess að hnykkja á því að almannatenglum beri að huga að þessum þáttum í störfum sínum.

Það myndi einnig senda almenningi skýr skilaboð um að það sé ekki endilega áfellisdómur yfir allri stéttinni þó að þar fyrirfinnist eitt eða tvö skemmd epli.

Það eru alltaf einhverjir svoleiðis, hvort sem litið er til lækna, lögfræðinga eða almannatengla.

---

Já. Ábendingar Benedikts eiga fullt erindi í umræðuna.

Almannatenglar vinna störf sín oft í tengslum við opinbera umræðu, hagsmuni einstakra aðila og almannahag.

Það er því eðlilegt og kannski beinlínis nauðsynlegt að sýna okkur vissa tortryggni.

En það er samt alls ekki sanngjarnt að tala um almannatengla almennt sem einhverja óvini gegnsærrar og gagnlegrar umræðu.

Enda gerði Benedikt það ekki heldur. Hann nefndi sjálfur að hans eigin starfsvettvangur, leikhúsið, væri illa statt ef ekki væri fyrir aðkomu almannatengla.

Ég tók nýlega saman hvaða eiginleika góður almannatengill þarf að hafa:

1. Góð almenn þekking á íslensku þjóðfélagi
2. Góð íslenskukunnátta. Bæði í töluðu og rituðu máli.
3. Hafa gaman af fólki. Eiga að auðvelt með að tengjast öðrum.
4. Góður skilningur á því hvernig fjölmiðlar fúnkera
5. Stórt tengslanet
6. Sannfæringarkraftur og gott siðferði

Í lýsingu á því hvað við gerum hjá Góðum samskiptum, sem finna má hér annars staðar á síðunni, kemur fram að:

Við vinnum með fólki, fyrirtækjum og félagasamtökum sem hafa eitthvað markvert fram að færa og hjálpum þeim að ná athygli fólks.
 

---

Benedikt hittir naglann á höfuðið þegar að hann hvetur „kynningarfulltrúa“ til að huga að samvisku sinni.

Þeir almannatenglar sem gæta þess að líta í eigin barm þegar við vinnum okkar, oft á tíðum viðkvæmu störf, eru ekki nokkur ógnun við almenning eða fjölmiðla. Eiginlega þvert á móti.

Þessu hef ég sjálfur, eftir besta megni, reynt að fylgja.

---

Fyrir tæpum tveimur árum ákváð fyrirtæki mitt, Góð samskipti, að semja sérstakar siðareglur fyrir okkur til að fylgja. Siðareglur sem kæmu til viðbótar siðareglum AÍ.

Ég sótti um þetta sama leyti námskeið í Endurmenntun HÍ hjá Vilhjálmi Árnasyni og Salvöru Nordal sem fjallaði um siðferðiskafla skýrslu RNA.

Kom þá fram í svari þeirra við fyrirspurn minni að heppilegast væri að fólk setti sér sínar eigin siðareglur, fremur en að siðfræðingar séu fengnir til þess verks.

Þannig sé líklegast að fólk fari eftir þeim.

Þannig sé líka auðveldara að herma þær upp á mann.



---

Ég var á þessum tíma, sannast sagna, ekki viss hvort að sérstakar siðareglur Góðra samskipta yrðu til nokkurs annars en að vera upp á punt.

Fallegur rammi með fögrum orðum.

Það hefur hins vegar komið mér þægilega á óvart að það hefur nokkrum sinnum komið til kasta siðareglnanna í störfum okkar undanfarin tvö ár.

Við höfum m.a. þurft að leita í þær þegar við höfum fengið beiðnir um að vinna fyrir ákveðna einstaklinga og fyrirtæki. Þá um það hvort við ættum að segja já eða nei við þessum beiðnum.

Einnig hefur reynt á þær þegar að beinir og óbeinir samkeppnisaðilar skjólstæðinga okkar hafa nálgast okkur.

Þó að við höfum e.t.v. þegar hallast í aðra hvora áttina þá hafa siðareglurnar haft úrslitaáhrif á ákvörðun okkar í hverju máli fyrir sig.

---

Setning siðareglna fyrir Góð samskipti markaði því nokkur þáttaskil hjá þessu litla fyrirtæki.

Ég hef sjálfur öðlast mun meiri trú á gildi slíkra siðareglna en ég hafði áður. Ég er mun öruggari í öllum störfum mínum eftir að siðareglurnar fóru upp á vegg og óttast síður að lenda á gráu svæði.

En grá svæði geta vissulega verið mörg í starfi almannatengla.

Síðasta haust tók svo samstarfskona mín hjá Góðum samskiptum, Herdís Ósk Helgadóttir, ákvörðun um að skrá sig í meistaranám í viðskiptasiðfræði í Háskóla Íslands og sinnir hún því meðfram störfum sínum hér.

Ég tel fullvíst að umræður innan okkar fyrirtækis um siðferðisleg álitamál höfðu nokkuð með það að gera að hún valdi að sérhæfa sig í viðskiptasiðferði.

---

Nýlega hlýddi ég á vikulegan netvarpsþátt kanadískra almannatengla (sem ég geri reglulega) þar sem til umræðu var spurningin „eiga allir rétt á góðum almannatengli?“

Svar mitt er já, kannski. En ég þarf samt ekki að starfa fyrir alla sem þess óska.

Í kjölfarið tók ég það upp innan fyrirtækisins hvort við ættum að setja það inn í siðareglur okkar, með hverjum og fyrir hverja við viljum starfa.

Niðurstaðan var að eftirtöldum greinum skyldi bætt við siðareglur Góðra samskipta.

Góð samskipti taka ekki að sér verkefni fyrir aðila sem eru í starfsemi sem er beinni í andstöðu við sannfæringu og siðvitund starfsmanna Góðra samskipta.

Góð samskipti taka ekki að sér verkefni fyrir aðila sem beita meðulum og vinnubrögðum sem eru óeðlileg að mati starfsmanna Góðra samskipta.

Góð samskipti áskilja sér rétt til að hafna viðskiptum við slíka aðila og til að slíta viðskiptum við núverandi skjólstæðinga ef í ljós kemur að framferði þeirra eða markmið ganga gegn siðferðis- og/eða réttlætiskennd starfsmanna Góðra samskipta.

---

Örlítið P.S. - fyrir þá sem hafa áhuga þá fór fram ágæt umræða um þessi mál á bloggsíðu blaðamannsins Friðriks Þórs Guðmundssonar í fyrra, þar sem að bæði almannatenglar og blaðamenn sögðu sína skoðun í athugasemdum við færslu Friðriks Þórs.

Kranablaðamennska.com

Ýmsir vilja meina að kranablaðamennska hafi aukist hin síðari ár.

Að með fækkun blaðamanna, lægri launum og hraðari starfsmannaveltu á fjölmiðlum, samhliða fjölgun almannatengla og upplýsingafulltrúa þá fari nú minni tími í sjálfstæða úrvinnslu frétta.

---

Það er vissulega rétt að hlutverk fjölmiðla er að breytast.

En það er kannski líka partur af eðli þeirra að þeir séu í sífelldri þróun.

Það er ekki bara svo að tækniþróun og neyslumynstur leiði bara af sér verri upplýsingamiðlun þó að mikilvægi og hlutverk einstakra miðla breytist.

---

En nú hafa bresk samtök sem berjast fyrir gæðum, gagnsæi og fagmennsku í fréttaflutningi sett upp vefsíðu til að afhjúpa þá fjölmiðla sem birta fréttatilkynningar svo til óbreyttar.

---

Svo er spurning hvort það þurfi alltaf að vera slæmt.

Ef að fréttatilkynning er vel skrifuð og sendandinn er traustsins verður, þá er kannski ekki óeðlilegt að hún birtist lítið breytt.

Eða hvað?