Skaðleg áhrif aspartams - urban legend?

Íslendingar virðast upp til hópa sannfærðir um að sætuefnið aspartam sé stórhættulegt. Undanfarin 2-3 ár hef ég ítrekað heyrt fólk lýsa meintum skaðlegum áhrifum af neyslu aspartams. Allt frá því að vera valda krabbameini yfir í candida-sveppasýkingu í þörmum manna.

Ég hef, vinnu minnar vegna, fengið upplýsingar um að þetta sé ekki rétt. Ég tók þess vegna eftir því að einn þekktasti næringarfræðingur landsins, Ólafur Sæmundsson, gerði þennan misskilning að umtalsefni í viðtali við Blaðið nú fyrir helgina (23.03.07 - "Mýtur um matarræði lífsseigar").

Þar segir hann það sem ég hafði áður fengið staðfest, að á engu aukaefni hafi verið gerðar jafn margar rannsóknir og á aspartam(þær skipta hundruðum) og að enginn þeirra hefði sýnt fram á með óyggjandi hætti að sætuefnið væri skaðlegt. Aspartam er auk þess viðurkennt af matvælastofnun Evrópu sem er með þeim strangari í heiminum.

Ég held að Ólafur væri ekki að segja þetta ef eitthvað væri til í þeim hryllingssögum sem verið er að dreifa um aspartam. Ólafur hefur meðal annars gefið út bækur um næringarfræði og myndi varla leggja orðspor sitt sem næringarfræðings að veði ef aspartam væri eitthvað vafasamt.

Ég get hins vegar vel skilið afhverju þessi saga um aspartamið er svona lífseig. Það er skemmtilegt að geta sagt við fólk sem er að reyna að draga úr orkuinntöku sinni að það sé tvíeggjað sverð að neyta sykurlausra vara. Það rímar enn fremur við viðteknar skoðanir um að óunnar vörur séu betri en unnar.

Staðreyndin er hins vegar sú að sykurneysla hefur aukist mikið og það er raunverulegt lýðheilsuvandamál. Sykurlausir drykkir eru þannig mikilvægur liður í því að draga úr notkun sykurs.

Að lokum má bæta því við að afar auðvelt er að sýna fram á að nánast allt geti verið krabbameinsvaldandi/hættulegt ef þess er bara neytt í nógu miklu magni. Aspartam er þar engin undantekning frekar en t.d. vatn. Sænskir vísindamenn sýndu fram á það fyrir nokkrum árum að of mikil vatnsdrykkja geti aukið hættu á krabbameini um allt að 50%...

TaB af markaði

Athugasemdir

[Herbert Guðmundsson, 25.3.2007 kl. 20:50]

Það er sjálfsagt tiltölulega útlátalaust að tjá sig með þessum hætti um sykurlausa drykki, eins og viðkomandi leggi fram stórasannleika! En ekki trúverðugt, því um þessi mál standa hvarvetna harðar deilur.

Ég var misserum saman fram í byrjun þessa árs þjakaður af mikilli slímsöfnun, sem leiddi til sífelldra erfiðra uppkasta og hnerra. Ekkert fannst að þrátt fyrir ítrekaðar rannsóknir. Leiðindin ein áþreifanleg.

Eftir ýmsar eigin tilraunir varðandi breytt mataræði, sem ekki höfðu nein áhrif, kom að því að hætta neyslu gosdrykkja með aspartam og litarefnum, aðallega Diet-Coce, sem ég neytti í verulegum mæli.

Tveim til þrem vikum síðar var þetta hvimleiða vandamál svo til úr sögunni og þannig er það ennþá. Ekkert annað breyttist á sama tíma en að ég lagði aspartam og litarefni í gosinu að baki.

Nú get ég samt ekki fullyrt að annað hvort eða hvort tveggja hafi verið mér til ama og tjóns misserin á undan, en sá grunur læðist að.  Að svo komnu þykir mér ótímabært að votta skaðleysi aspartam.

[Ísdrottningin, 26.3.2007 kl. 00:54]

Ég held að það sé frekar skaðlegt en hitt að fullyrða að efni eins og Aspartam sé skaðlaust.  Hvað t.d. með afleiðingar sem gætu skilað sér sem hjartveiki eða ófrjósemi eða eitthvað þaðan af verra í þriðja eða fjórða ættlið?   Ég held að svona efni verði sjaldan fullrannsökuð þó að markaðsöflin vilji gjarnan fullyrða það, minni á msg því til sönnunar. 

Msg var talið skaðlaust þar til annað kom í ljós.  Í dag er vitað að það  er skaðlegt fólki í miklu magni en að fólk er misviðkvæmt fyrir því svo að sumir þola í einhverju magni en aðrir alls ekki, enda vitað að það safnast upp í líkamanum. Msg er að finna í miklu fleiri matvælum í dag heldur en fólk almennt gerir sér grein fyrir.  Það er til dæmis að finna í öllum pakkamat, öllum tilbúnum fisk og kjötréttum, mörgum kryddum og svo framvegis og svo framvegis og svo er að verða um aspartam líka.

Ég set fyrirvara við öll efni til matar/matargerðar sem eru slíkur mannanna tilbúningur. 

[Þórir Hrafn Gunnarsson, 27.3.2007 kl. 12:46]

Reyndar er það líka þekkt staðreynd í þessum fræðum að MSG er líka því sem næst skaðlaust. 

Það er enn ein af þessum mýtum.

Kveðjur :)