Dagvaktin aðaltrompið

Fór í partýkynningu á vetrardagskrá Stöðvar 2 á fimmtudagskvöldið á Rúbín í Öskjuhlíð.

Ljóst að Dagvaktin er aðaltromp stöðvarinnar í haust. Þeir sem voru mættir tímanlega sáu sá brot úr einum þætti og einhverjir voru búnir að fá forsýningu á fyrsta þættinum.

Báðir hópar voru sammála um að Dagvaktin lofi góðu og muni jafnvel taka Næturvaktinni fram. 

.









-----

Veit einhver annars hvernig þetta gengur að reka þennan stað, Rúbín, þarna í horninu á Keiluhöllinni?

Held að Reykvíkingar séu ansi fastir í því að fara niður í bæ til að sýna sig og sjá annan á djamminu.

-----

En þarna voru samankomnir allir metnaðarfyllstu markaðsmenn- og konur á Íslandi að borða snittur og drekka bjór. Búið að koma upp tjaldi út á svölum og maður notaði tækifærið til að mingla aðeins við fólkið.

Ég fékk í hausinn eitthvað óþarfa gaspur frá því í partýinu á Keflavíkurflugvelli. Kunningjar mínir hjá símafyrirtækjunu tóku það hátíðlega og drógu ályktanir af færslum á þetta blogg að ég væri kominn á launaskrá hjá samkeppnisaðilanum.

Það leystist allt farsællega og við hlógum dátt. Ég hótaði að krítisera auglýsingarnar þeirra þangað til að þau væru búin að ráða mig í vinnu.

-----

Úff... nú fæ ég eftirlits-kommentarana örugglega í athugasemdakerfið.

Art of innovation

Þessi fyrirlestur hjá Guy Kawasaki er fyrir löngu orðinn klassískur.

Þeim sem vilja styttri útgáfu af sama efni er bent á Ted.com eða bloggið hans Guy. Þar var að koma inn nýr 15 mínútna langur fyrirlestur, þar sem að Guy fer yfir 5 atriði til að hafa í huga ef maður er frumkvöðull í leit að áhættufjármagni.

Nokkuð gott stöff.

-----

Síðan er Seth Godin líka fínn fyrirlesari.

Gott partý - en smá klikk

Föstudagurinn var skrambi góður.

Fundir með nýjum viðskiptavinum fram eftir degi, smá pólitík seinnipartinn og svo partý um kvöldið.

Ég fattaði hins vegar ekki fyrr en ég skrapp úr partíinu til að tala um fréttir vikunnar í Íslandi í dag að ég hafði klúðrað því að bjóða mörgum af mínum bestu vinum.

Þegar ég kom út úr sjónvarpsstúdíóinu beið mín eftirfarandi sms:

"Hvad þarf madur ad heyra i sjonvarpinu ad thad se party. Myrdal"

-----

Öðrum til varnaðar vil ég benda fólki á að treysta ekki bara á Facebook til að bjóða á uppákomur. Ég er búinn að vera svo mikið á Facebook undanfarið og mér fannst bara eins og allir vinir mínur væru þar líka. Þannig að ég bauð og ítrekaði í opnunarteitið bara þar og ekki eftir neinum öðrum leiðum.

Reyndar spilaði inn í að ég var líka án símabókarinnar minnar þar sem farsíminn er í viðgerð. Hugsa að ég hefði ekki klikkað annars á að bjóða Gunna Sveinbjörns, Lízellu og Jóni Mýrdal.

Lokaklikk dagsins var svo að gleyma að taka myndir í teitinu. 

Þakka öllum sem komu og líka hinum sem komust ekki.

Umdeild auglýsing með Jerry Seinfeld og Bill Gates

Microsoft hefur lent í miklum andbyr með nýjasta stýrikerfið sitt: Windows Vista.

Undanfarið hafa þeir verið með mikla relaunch-herferð í gangi þar sem þeir viðurkenna að fyrsta útgáfan var ekki nógu góð. Í því felst lexía í almannatengslum sem forsvarsmenn fyrirtækja eiga oft mjög erfitt með að kyngja.

Nýjasta útspilið er auglýsingaherferð með Jerry Seinfeld. Fyrsta auglýsingin fór í birtingu í síðustu viku og bloggarar í tölvugeiranum eru þegar byrjaðir að rífast um það hvort auglýsingin muni virka... eða hvort að Bill Gates sem leikari muni ekki fæla enn fleiri frá því að nota Vista. 

Bjartsýni

Ég fylgist frekar vel með viðskiptalífinu á Íslandi.

Samt ætti ég erfitt með að svara þessum spurningum sem Stoðir eru að leggja fyrir úrtak af  Íslendingum.

Annars mætti segja mér að ef svör Júlíusar Þorfinnssonar stemma, að þetta sé til að búa til mælistiku um ímynd fyrirtækisins, þá er þetta nokkuð sniðugt hjá honum.

Þ.e.a.s. að hann sem PR-maður fyrirtækisins getur ekki annað grætt á því að fá mælingu núna, beint í kjölfarið á þessari nafnabreytinga-hringekju sem eignarhaldsfélög í meirihlutaeigu Baugs og skyldra aðila hafa verið í.

Niðurstöðurnar geta ekki annað en farið upp á við í öllum könnunum héðan í frá.

-----

Er ekki Stoðir nýja nafnið á FL-Group? Og var einhvern tíma í fyrndinni nafnið á fasteignaþróunarfélagi Baugs. Sem núna heitir Landic Properties.

Ef ég væri PR-ráðgjafi þessara og annarra slíkra fyrirtækja, þá myndi ég láta staðar numið í endurmörkunarvinnu og nafnabreytingum næstu árin.

Slíkt er dýrt í framkvæmd og ekki alltaf hagkvæmt, jafnvel þó að það verði áfram tíðar breytingar á eignarhaldi þessara fyrirtækja.

-----

Ný heimasíða Stoða er hins vegar óvenjuleg. Hef ekki séð þetta áður.

Innblástur símafyrirtækja

Síminn er víst ekki einn um að stela konseptum af T-Mobile.

Vodafone á Íslandi hefur væntanlega einhverntíma rekið augun í þessa herferð hér. T-mobile – frítt í 5 sama hvaða kerfi.

Og hér er ein af auglýsingunum úr herferðinni:

Vinna, vinna, vinna

Nóg að gera í litla almannatengslafyrirtækinu á þessum fagra miðvikudagsmorgni.

Verkefni morgunsins:

1. Klára kynningu sem grænu orkuútrásarmennirnir ætla að flytja á fundi í Kólumbíu á eftir.

2. Skipuleggja heimsókn framkvæmdastjóra evrópska æskulýðssambandsins hingað til lands eftir rúmar 2 vikur.

3. Setja saman kynningu sem flutt verður á fundi nokkurra norrænna upplýsingafulltrúa ráðuneyta í Bláa lóninu á morgun. Fluttur af mér semsagt. Kynningin fjallar um mikið hjartans mál mitt eða "PR in the age of social media".

Um leið er ég að vinna í almennum fyrirlestri um kynningarmál sem ég ætla að flytja víðar í vetur. Þeir sem vilja bóka mig mættu gjarnan hafa samband.

Ég er svo að gæla við að skella mér aðeins ofan í lónið eftir fyrirlesturinn.



Liggja og mara í hálfu kafi í hádeginu á vinnudegi. "Það er Síminn!"... eða eitthvað :)

Mastercard maður til Visa

Kristján Harðarson var alinn upp hjá Kreditkortum, umboðsaðila Mastercard á Íslandi.

Eftir nokkurra ára millilendingu hjá SPRON er hann nú aftur á leið í kortabransann, nema bara til erkióvinarins; Valitor sem er umboðsaðili VISA á Íslandi.

Þetta er bara næstum eins og þegar að Luis Figo fór frá Barcelona til Real Madrid.

-----

Væntanlega er þetta fyrsta fréttin af mörgum af vistaskiptum fyrrum starfsmanna SPRON, sem skv. slúðrinu eru bæði of margir og of hátt launaðir að mati nýja eigandans, Kaupþings.

Flottur vefbanner - ófrumleg auglýsing

Spron er með nýja auglýsingaherferð.

Reyndar sýnist manni á því hversu dýr sjónvarpsauglýsingin er, að ákvörðunin um að fara í herferðina hafi verið tekin áður en allt fór á versta veg í SPRON og áður en fyrirtækið var yfirtekið á spottprís af Kaupþingi.

Sjónvarpsauglýsingin er því miður ekki sérlega frumleg. Svona týpísk bankaauglýsing með fólki í dagsins önn, allir að gera eitthvað uppbyggilegt.

Ég gæti næstum ælt.

Og það myndi pottþétt framkalla uppköst hjá Seth Godin ef hann heyrði um þetta.

Þessi vefbanner vakti hins vegar athygli mína:



Þið þurfið reyndar að fara á Vísi til að sjá hann í aksjón. En þarna er semsagt búið að setja hreyfimyndaskrá inn í Flash-borðann, sem sýnir stutt brot úr sjónvarpsauglýsingunni.

Nokkuð nett. Og líklega ekki síðasti vefborðinn sem við sjáum af þessari gerð.

-----

Tek fram að ég æli ekki yfir stjörnuleik svifflugmannsins í auglýsingunni.

En þar er á ferðinni hann Sveinbjörn Sveinbjörnsson, litli bróðir eins besta vinar míns og mikill öðlingur.

Og ég get vottað að þetta er engin tölvugrafík sem þarna sést. Sveinbjörn er búinn að fljúga svifflugum frá því að hann var lítill gutti.

Nýtt undir sólinni?

Það reyndist rétt ágiskun sem ég skrifaði á þetta blogg um helgina.

Ný auglýsing Símans er ekki upprunaleg hugmynd.

Reyndar er klipp þar sem unglingsstúlka stendur fyrir utan bíóhús í auglýsingu T-mobile, nákvæm eftirmynd þess þegar íslensk unglingsstúlka stendur fyrir utan Tívólí í auglýsingu Símans.

Hér er auglýsing T-Mobile:

Hér er svo aftur auglýsing Símans:

 

Ætli auglýsingagerðarmennirnir sem gerðu auglýsingu T-Mobile fái á móti að endurgera Jesúsar, Júdasar og Galíleó auglýsingar Símans?