Virka súrrealískar og amatörslegar auglýsingar betur?

Það verður æ erfiðara að ná athygli fólks með auglýsingum. Þetta hefur orðið til þess að framleiddar eru æ skrýtnari auglýsingar sem virðast í fljóti bragði lítið segja um eiginleika vörunnar sem verið er að auglýsa. Kannski er þetta að hluta til gert í þeim tilgangi að fá fólk til að tala um þær eða jafnvel bloggi um þær eins og ég er að gera núna.

Allavega þá eru hér tvö dæmi. Önnur er Fiat-auglýsing og hin er frá einum af samkeppnisaðilum Google.

Þekktur öðlingur í framboð

Það er ekki hægt annað en að fagna þessu. Það vita allir sem þekkja Magnús hversu mikill öðlingur er þar á ferð.

Hlýtur að vera gott fyrir Samfylkinguna ef hann situr þar í æðstu stjórn enda bætir hann hvern þann hóp sem hann kemur að.

Tvennt sem ég vil þó nefna honum til lasts:

1) Hvað hann er hrikalega slappur í Singstar.

2) Hann á enn eftir að gera að fullu upp við mig vegna afmælisgjafar sem ég lagði út fyrir og var til sameiginlegs vinar okkar.

Bið hann vinsamlega að gera þetta upp sem fyrst!

AJ.

Misskildu þetta einhverjir innflytjendur og mættu á fundinn?

Ég var að hlusta á endurflutning frá því í morgun á Útvarpi Sögu og heyrði þessa auglýsingu frá Frjálslynda flokknum.

"Ísland og innflytjendur. Fundur í kvöld í Skeifunni 7 klukkan átta. Jón Magnússon og Magnús Þór Hafsteinsson flytja erindi. Jazzband spilar."

Fyrirsögnin er dálítið hlutlaus finnst mér og ekki nógu lýsandi? Ætli þetta hafi verið fundur fyrir innflytjendur hugsaði ég með mér. Þeir hefðu þá mátt splæsa í nokkur orð í viðbót í auglýsingunni:

Ísland og innflytjendur - kynningarfundur þar sem innflytjendum er kynnt sú fjölbreytta þjónusta sem þeim stendur til boða hér og hvernig við getum látið þá finna sem best að þeir séu velkomnir.

Frjálslyndi flokkurinn.

 

AJ.

Meiri metnað í viðskiptafréttum takk!

Svona fréttir eins og þessi hér eru allt of algengar. Löng upptalning á einhverjum eignarhaldsfélögum og lýsingar á því hvernig eitt félagið eigi í öðru og svo koll af kolli.

Reyndar er sagt frá því að Björgólfsfeðgar eigi nú engan hlut í TM. Það er oft ekki svo gott að slíkra grundvallarbreytinga sé getið á skýran hátt. Eignarhaldsfélagasúpan er stundum látin nægja.

En það eru margar spuringar sem vakna. Hverju breytir þetta? Hvert var sölugengið? Högnuðust þeir á fjárfestingu sinni? Verða breytingar á stjórn? Hverjir stýra félaginu þá í dag. Tryggir hlutur Kjarrhólma full yfirráð yfir félaginu? Hverjir eiga Sólstafi og Imon ehf. Hvernig hefur gengi TM verið? Segja þessar breytingar okkur eitthvað um fjárfestingastefnu eða breyttar áherslur hjá FL Group eða Björgólfsfeðgum?

Tek fram að ég tryggi hjá TM og er mjög ánægður þar. :)

Björgólfsfeðgar selja hlut sinn í TM

Ríkið heldur áfram að fjárfesta í einkahlutafélögum

Eins og ég hefur áður fjallað um á þessu bloggi þá þykir mér (og sjálfsagt mörgum öðrum) óeðlilegt hversu umsvifamikið ríkið er á samkeppnismarkaði og hvernig ríkisfyrirtæki og stofnanir eru að taka, að því er virðist, sjálfstæðar ákvarðanir um að setja peninga skattborgarana í alls kyns áhættusaman rekstur í samkeppni við einkaaðila.

Menn hafa nefnt dæmi um slíka háttsemi í tengslum við Íslandspóst, fjármálaráðuneytið, ríkisspítalana, flugmálastjórn, matvælastofnun, utanríkisráðuneytið í gegnum flugstöðina o.s.frv. Dæmin eru því miður talsvert fleiri.

Ég rak augun í þetta hér á vefsíðu vefmælingafyrirtækisins Modernus og sá að Ingimundur Sigurpálsson, forstjóri Íslandspósts situr þar í stjórn:

Hlutafé og stjórn Einkahlutafélagið Modernus var stofnað 4. mars 2000 í húsakynnum félagsins að Garðastræti 17, 101 Reykjavík. Hlutafé félagsins er kr. 27.039.494 að nafnvirði. Hluthafarnir eru þrettán og þrír af stofnendunum eiga meira en 10% í félaginu. Stjórnarformaður Modernus ehf er Tryggvi Karl Eiríksson sérfræðingur hjá Hagstofu Íslands. Aðrir í stjórn eru Bárður Hreinn Tryggvason fasteignasali og fjárfestir, Magnús Soffaníasson meðstofnandi og framkvæmdastjóri TSC ehf, Jens Pétur Jensen þjóðhagfræðingur, sem jafnframt er framkvæmdastjóri og stærsti eigandi félagsins, og Ingimundur Sigurpálsson forstjóri Íslandspósts, en Íslandspóstur hf. er nýjasti hluthafinn með tæplega 19% hlut.

Ég leitaði í fréttum á heimasíðu Íslandspósts sem venjulega er mjög duglegur að senda frá sér fréttir um allt mögulegt sem hann tekur sér fyrir hendur en ekkert fann ég um kaupin í Modernus. Í ársskýrslu er hins vegar skylt að skýra frá svona kaupum og þar fann ég þetta loksins og reyndar meira til. Það kemur upp úr kafinu að við skattborgararnir erum í gegnum Íslandspóst einnig hluthafar í Norðlenska matborðinu ehf. (Hvað er Pósturinn að gera að fjárfesta í kjötvinnslu?!?).

Jasso! Og svo skilja menn ekki afhverju ríkið blæs út!

AJ.

Orðrómur um yfirtökur á breskum fyrirtækjum hluti af umfangsmiklu verðbréfasvindli?

James Harding, viðskiptaritstjóri The Times segir í pistli í dag að svo virðist sem fjárfestar séu auðveld bráð fyrir svindlara sem stundi það að koma af stað fölskum orðrómi um áhuga einhverra tiltekinna óskráðra fjárfestingafélaga eða fjársterkra einstaklinga á almenningshlutafélögum í Bretlandi.

Nefnir hann meðal annars nokkur fyrirtæki sem sum hver hafa verið tíður fréttamatur hér á landi sem möguleg yfirtöku-skotmörk íslenskra fjárfesta. 

Svindlararnir vita sem er, að svona yfirtökuorðrómur ýtir verði hlutabréfa upp um kannski plús/mínus 10% og það má græða vel á slíkri "spá"kaupmennsku. Aðalpunkturinn hjá Harding er hversu feikilega erfitt það sé að refsa fyrir þessa iðju eða fylgjast með henni.

AJ.

Athyglisverð herferð Múrbúðarinnar

Mér barst þetta í dag. Athyglisverð nálgun á samkeppnina. Sjálfsagt að birta þetta bara í heild sinni:

Fréttatilkynning 28. mars 2007

Dauðaleit hafin að kvittun frá BYKO

Múrbúðin hefur hafið dauðaleit að kvittun frá BYKO. Sá sem finnur viðkomandi kvittun fær helgarferð fyrir tvo til London í verðlaun.

Þetta er kvittun sem sýnir að viðkomandi hafi borgað 7.399 kr. í BYKO fyrir ákveðna tegund af málningu, sem BYKO hefur auglýst mikið undanfarna mánuði.

BYKO hefur látið í það skína í auglýsingum sínum að viðskiptavinir fái umrædda málningu með góðum afslætti. Sýnt er yfirstrikað verð upp á 7.399 kr og tilboðsverð upp á 4.990 kr. Múrbúðin hefur ástæðu til að ætla að BYKO hafi aldrei selt svo mikið sem eina fötu af þessari málningu á 7.399 kr. Þar með er 4.990 kr. verðið ekki lækkað verð og auglýsingin er þá brot á lögum um óréttmæta viðskiptahætti.

En Múrbúðin vill láta BYKO njóta vafans og auglýsir því eftir kvittun sem sýnir að þessi málning hafi einhvern tímann verið seld á hærra verðinu. Til að örva áhugann á því að leita að kvittuninni heitir Múrbúðin þeim sem hana finnur helgarferð fyrir tvo til London í verðlaun. Ef fleiri en ein kvittun kemur í leitirnar, þá verður dregið úr þeim.

Frestur til að koma með kvittanir í Múrbúðina er til kl. 17 á morgun, fimmtudag 29. mars. Þá verður tilkynnt um það hvort einhverjar kvittanir hafi komið í leitirnar, eða hvort sannast hafi að auglýsingar BYKO eru til þess fallnar að blekkja neytendur.

Leit Múrbúðarinnar að kvittuninni frá BYKO er liður í herferð fyrirtækisins gegn Múskó-væðingu viðskiptalífsins. Aðferðir “Múskó” fyrirtækjanna ganga út á að rugla neytendur í ríminu með endalausum tilboðum, afsláttum og útsölum, þar sem illmögulegt er að sjá hvort um raunverulega verðlækkun er að ræða eða ekki eða að upplýsingar eru ófullnægjandi eða
hreinlega villandi.

Múskó-væðing viðskiptalífsins gengur gegn hagsmunum neytenda.

Meira á www.musko.is

Úr lögum nr 57/2005 um eftirlit með óréttmætum viðskiptaháttum:

6. gr. Óheimilt er að veita rangar, ófullnægjandi eða villandi upplýsingar í auglýsingum eða með öðrum hætti eða beita öðrum slíkum viðskiptaaðferðum sem sama marki eru brenndar...

14. gr. Útsölu eða aðra sölu, þar sem selt er á lækkuðu verði, má því aðeins auglýsa eða tilkynna að um raunverulega verðlækkun sé að ræða.

Fréttatilkynning frá Múrbúðinni ehf.

Dýr markaðsbrella

Aðal slúðurfréttavefurinn í Bandaríkjunum, TMZ.com, er nú þegar búinn að finna út að þessi árekstur Eddie Griffins á Ferrari Enzo bifreið, sem sagt hefur verið frá í öllum helstu fjölmiðlum heims er ekkert nema markaðsbrella til að kynna myndina sem hann er að leika í "Redline".

Þið getið skorið úr um þetta sjálf með því rýna í þetta myndband.

Tilvitnun dagsins #3

"Today, the L.A. Times accused Arnold Schwarzenegger of groping six women. I'm telling you, this guy is presidential material."

David Letterman, grínisti

Er meiri samþjöppun í bankakerfinu skynsamleg?

Ekki alls fyrir löngu var því slegið upp á forsíðu Morgunblaðsins að áhugi væri á sameiningu Glitnis og Kaupþings.

Margir furðuðu sig á þessari hugmynd enda óvíða jafn fáir sterkir bankar í einu landi eins og hér. Ef stóru viðskiptabönkunum fækkaði úr þremur í tvo til viðbótar við yfistandandi sameiningu sparisjóða þá væri hætt við að verulega drægi úr samkeppni með tilheyrandi neikvæðum áhrifum fyrir viðskiptavini bankakerfisins.

En þetta er líka spurning um að tryggja eðlilega verðmyndun á markaði. T.d. væri spurning hvort það væri ávísun á hættuástand fyrir krónuna ef aðilum á innlendum gjaldeyrismarkaði fækkaði í tvo (þeir eru nú Glitnir, Kaupþing og Landsbankinn).

Það eru víða stórir bankar og vissulega hefur þróunin víðast hvar verið í átt til frekari samþjöppunar. En hvergi á byggðu bóli er hlutdeild bankana slík sem hún er hér. Þessi mynd hér að neðan á við árið 2003. Hlutdeildin hefur eitthvað aukist síðan þá.

Sameining á milli Glitnis, Kaupþings eða Landsbankans hlýtur að teljast vera nær útilokuð ef þetta er skoðað.