N1 = íslenskt hvað?

Var að hlusta á Rás 2 um daginn og datt inn á langan og dramatískan leiklestur á goðsögninni um íslensku landvættina.

Kom í ljós að um var að ræða útvarpsauglýsingu frá N1 - "Enn-einum" (áður Esso).

-----

Síðan hef ég líka séð sjónvarpsauglýsingu, byggða á þessari hugmynd, þar sem að auglýsingafyrirsætur fara í hlutverk einhvers konar nútíma-landvætta og halla sér upp að merki N1.

Skilaboðin eru "MEIRA ÍSLENSKT Í LEIÐINNI"

En ég skil ekki alveg tenginguna. N1 selur fyrst og fremst innflutta vöru. Framleiðir ekki neitt.

 

-----

Ekki það, auðvitað vinna Íslendingar í hinum ýmsu deildum Olíufélagsins N1.

En ég hef frekar kallað það galla en kost, að ekki sé nein raunveruleg samkeppni á þessum markaði. Ég neyðist til að velja innlenda olíudreifingaraðila.

Hvað þá að ég geti valið á milli íslenskra og erlendra orkugjafa.

-----

Hver er því kjarninn í auglýsingunni?

Vildi N1 bara nýta sér ríkari þjóðerniskennd Íslendinga á þessum síðustu og verstu?

Eru þeir bara að hugsa eins og sölumenn sjónvarpstækja þegar að kemur að Eurovision eða stórmóti í handknattleik?

Athugasemdir

[Jónas (IP-tala skráð) 17.11.2008 kl. 09:05]

Þó að ég sjálfur hafi orðið hvumsa við að sjá þessa sjónvarpsauglýsingu finnst mér hún eiga mun meiri rétt á sér en sú frá Herragarðinum, hvar segir: „Verslum í íslenskum verslunum - Sand, Boss, ....“

Með „Meira í leiðinni“ hefur N1 reyndar verið að auglýsa „allt hitt“ - sælgæti, gos og annað slíkt - sem að miklu leiti til er íslenskt.

[101moi (IP-tala skráð) 17.11.2008 kl. 09:42]

Það er allt reynt í dag og misjafnlega smekklaust. Td. er þessi útfærsla af skjaldarmerkinu þar sem fólki er stillt upp í stað vætta og N1 lógó í stað fána alveg misheppnuð og lýsir einhverju mikilmennskubrjálæði.

[Örn Úlfar Sævarsson (IP-tala skráð) 19.11.2008 kl. 12:41]

Ja, þetta er nú ekki alveg rétt. N1 hefur unnið merkilegt frumkvöðlastarf í sölu á innlendum orkugjafa - metani.

[Andrés Jónsson, 19.11.2008 kl. 13:12]

Örn Úlfar: Takk fyrir að leiðrétta það. Ég var búinn að gleyma því. Á hvað mörgum stöðvum er það í boði?

[Þórður J (IP-tala skráð) 20.11.2008 kl. 02:04]

Sæll Andrés.

Heyrði í dag að það skemmtilega við þessa N1 "íslensku" landvættaauglýsinguna með skjaldarmerkinu utanum, að tónlistin sem er spiluð er ALLS EKKI ÍSLENSK, ennein vitleysan á þeim bæ...

Kv.þj