Bjórframleiðandi með markaðsfyrirsát á HM

HM býður ekki aðeins upp á bestu fótboltamenn heims sem mætast á vellinum í tugum fótboltaleikja, heldur einnig fjölmörg tækifæri fyrir seljendur vöru og þjónustu að koma sér á framfæri.

Sum stór vörumerki semja við FIFA um milljarða-styrkarsamninga og njóta þannig mestrar athygli sjónvarpsáhorfenda.

En það eru til fleiri leiðir.

---

Ambush marketing eða markaðsfyrirsát er aðferð sem getur aflað fyrirtækjum mikilli athygli þegar vel tekst til. 

Stórir atburðir þar sem athygli fjölmargra hugsanlegra viðskiptavina er tryggð er vel þekktur vettvangur slíkrar markaðssetningar.

Bavaria bjórframleiðandinn er ekki á meðal formlegra styrktaraðila FIFA en vildi engu að síður vekja athygli bjórþyrstra fótboltaunnenda. 

Hvað þeir gerðu má lesa um í þessari frétt og myndbandinu hér að neðan.

 

Mad Men Barbie

Mad Men eru frábærir sjónvarpsþættir. Vinsælir bæði hjá markaðsfólki og öðrum.

Nú mun vera fyrirhugað að gefa út sérstakar Barbie-dúkkur sem byggja á persónum þáttanna.

Upplagið sem verður fáanlegt verður takmarkað og stílað inn á harða aðdáendur þáttanna.

Semsagt ekki börn :)

Segja má að Barbie veiti ekki af smá jákvæðri athygli. Þessi dúkka, sem hefur upplifað tímana tvenna, hefur líklega aldrei legið jafn lágt í umræðunni.

---

Annars var ég að glugga í bók sem ég er búinn að eiga upp í hillu í nokkurn tíma og er eftir einn helsta auglýsingamógul síðustu aldar, David Ogilvy.

Bókin heitir 'Confessions of an Advertising Man' og það verður að segjast að sé miðað við það sem hann skrifar þá eru Mad Men þættirnir alls ekki svo fjarri raunveruleikanum.

Meðal annars segist Ogilvy aldrei nota aðrar vörur en þær sem hann auglýsir sjálfur. Þannig "neyðist" hann meðal annars til að aka aðeins á Rolls Royce.

Lúðurinn

Uppskeruhátíð auglýsingabransans er í dag. Afhentir verða lúðrar fyrir bestu herferðir.

Þessi auglýsing JL fyrir Jónar Transport er ansi sigurstrangsleg í flokknum 'Veggspjöld'.

Smellið hér til að fá stóra mynd.

Öskudagur

Sem betur fer klikkuðum við ekki á að kaupa nammi fyrir öskudaginn. Hingað komu þrír strákar og tóku hið vinsæla lag Bahama og voru meira að segja búnir að æfa sérstök dansspor með.

Sá í miðjunni sagðist vera "bankastjóri Icesave"

Bankar og traust

Íslenskir bankar og fjármálastofnanir hafa á undanförnum misserum reynt ýmsar aðferðir til að reisa ímynd sína úr rústum bankahrunsins.



Sumir hafa reynt að skýla sér á bakvið almenna starfsmenn sína.

Sumir hafa skipt um nafn, með misjöfnum árangri.

Sumir þeirra telja sig hafa fundið svarið í því að framleiða 'infomercials'.



Meira að segja sparisjóðirnir, sem láta leikkonu komna af léttasta skeiði tala um traust í miðjum kornakri, eru á villigötum um hvernig þeir eiga að byggja upp ímynd sína á ný.

---

Með fullri virðingu fyrir starfsfólki markaðsdeilda bankanna og auglýsingastofa þeirra, þá er áberandi við allar þessar tilraunir að það er lítið sem ekkert horft til almannatengsla.

Þetta er alls ekki allt illa gert. Frá sjónarhóli auglýsingafræða er þetta allt nokkurn veginn skv. bókinni.

Vandamálið er bara að það er verið að leita að lausnum í rangri verkfærakistu.

---

Það er ekki nóg að tala um traust í auglýsingum til að fá fólk til að treysta þér.

Það er ekki nóg að velja traustvekjandi fólk til að leika í sjónvarpsauglýsingum.

Og það er ekki nóg að fá allt í einu rosalegan áhuga á því sem er ókeypis, íslenskt og gamaldags.

---

Flestir bankarnir hafa fallið í þessa gryfju.

Á því er þó ein undantekning.



Íslandsbanki hefur undanfarið byrjað að nota almannatengsl nákvæmlega á þann hátt sem á að gera það.

Með því að bregðast rétt við þeim málum sem upp koma og nota neikvæða umfjöllun sem tækifæri til að auka traust á bankanum.

Nýjasta dæmið er fréttilkynning bankans í kvöld.

Ef fram fer sem horfir þá verður Íslandsbanki fyrsti bankinn sem öðlast traust almennings á ný.

Richard Branson kynnir lúxuskafbát

Ég hef alltaf svolítið gaman af að fylgjast með Richard Branson.

Hann hefur í fyrsta lagi ótrúlega tilfinningu fyrir almannatengslum og er í öðru lagi frábær fyrirmynd fyrir upprennandi frumkvöðla.

---

Undanfarin ár hefur hann í auknum mæli farið að gera út á hina ofurríku. Þá sem eiga svo mikla peninga að þeir eiga nánast allt.

Ekki endilega göfugt starf, en það eru áreiðanlega nóg af tækifærum í þessari þjónustu í ljósi hinnar ört vaxandi misskiptingar í heiminum.

---

Fyrst voru það lítil lúxushótel og þróun fyrstu farþega-geimskutlunnar í heimi.

Það nýjasta er kafbátur eða neðansjávarflugvél sem sjá má hér að neðan.

Ekkert að því að láta sig dreyma um ferð í svona.

Steve Jobs sýnir klærnar

Hinn dáði forstjóri Apple, Steve Jobs, dró ekki af sér gagnvart keppinautunum á fundi með starfsfólki í höfuðstöðvum fyrirtækisins í síðustu viku.

Eins og hefur áður komið fram þá gekk Eric Schmidt forstjóri Google úr stjórn Apple fyrir nokkru vegna hagsmunaárekstra og það virðist sem að það sé langt í frá gróið um heilt á milli þessara tveggja risafyrirtækja í tæknigeiranum.


Meðal annars kallaði Jobs "Don't be evil" möntru Google kjaftæði í svari við spurningu eins af starfsmönnum Apple á fundinum.

Hann ásakaði Google enn fremur um að reyna að drepa iPhone-símann, en að þeim yrði sko ekki kápan úr því klæðinu.

Einnig sagði Jobs að forsvarsmenn Adobe fyrirtækisins væru latir og að Flash-hugbúnaður þeirra væri að verða úreltur.

---

Skal ekki segja með Adobe, en ég get tekið undir að Google er úlfur í sauðagæru og þeir einbeita sér að ýmsu öðru en því að bæta heiminn.



T.d. eru ýmsir á því að skyndileg umþóttun þeirra gagnvart net-ritskoðun Kínverja hafi meira að gera með versnandi ímynd Google og væntanleg málaferli gegn þeim út af samkeppnismálum, en mikla endurnýjaða ást á tjáningarfrelsinu.

 

Snöggir markaðsmenn

Via Gommit

Web 2.0 suicide machine

Þetta er frekar fyndið. Þó að persónulega sé ég ekki tilbúinn að skilja við líf mitt á netinu.

web 2.0 suicide machine promotion from moddr_ on Vimeo.

Góð skilgreining á Twitter

Í mig hringdi blaðamaður og vildi vita hvað væri eiginlega málið með Twitter.

Ég ákvað að nýta mér tengslanetið og spurði fólkið á Twitter hvernig ég ætti að svara þessu.

---

Þar sem ég nota Twitter til að tjá mig á hinum ýmsu ólíkum samfélagsmiðlum þá bárust svör á nokkrum stöðum, bæði Twitter og Facebook.

Ein flottasta skilgreiningin kom í gegnum Linked-in:

"Á meðan Facebook er staðurinn þar sem vinátta og kunningsskapur tengir fólk er Twitter staðurinn þar sem ókunnugt fólk sameinast um áhugamál, hugsjónir og hugmyndir. Sem er etv. eitthvað sem íslendingar mættu sameinast um, uppúr kunningjasamfélaginu"

 

Höfundurinn er Einar Örn Sigurdórsson, sem starfar sem listrænn stjórnandi á Íslensku auglýsingastofunni.

Nokkuð gott hjá honum.

---

Bendi líka á þessa sniðugu íslensku Twitter-leitarvél.

Það er Geir Freysson sem á heiðurinn af henni. Hann er líka mjög öflugur Twittari.

Hér er svo stóra alþjóðlega Twitter-leitarvélin.

Vel heppnaðar sjónvarpsauglýsingar

Nýjar sjónvarpsauglýsingar lambakjötsframleiðanda eru ákaflega vel heppnaðar.

Þá meina ég "vel heppnaðar" í þeim skilningi að þær eru líklegar til að auka neyslu á lambakjöti (eða að minnsta kosti draga úr sölusamdrætti vegna kreppunnar).

Oft hafa auglýsingar frá samtökum hinna ýmsu framleiðenda landbúnaðarvara verið sýnidæmi um frumlegheit auglýsingafólks, en ekki endilega náð að koma við bragðlauka áhorfenda.

---

Nýjasta auglýsingin sýnir Gunnar Hansson leikara (sem búið var að stimpla inn sem andlit lambakjötsins) elda spennandi lambakjötsrétt á skömmum tíma. Einhverskonar lambafilebitar vafnir inn í pönnuköku úr ferskum kartöfluspænum.

Auglýsingin er sett upp eins og stytt útgáfa af kennslu sjónvarpskokks og virkar þannig til að ná athygli áhorfenda með réttu skilaboðunum.

Hún er öðruvísi en auglýsingarnar sem birtast fyrir og eftir að því leyti að hún er eiginlega ekki auglýsing, heldur þá er maður að læra eitthvað.

Um leið og áhorfandinn fær þannig eitthvað fyrir sinn snúð þá er lambakjöti komið inn í kollinn á honum sem sniðugt hráefni til að prófa sig áfram með í eldhúsinu.

---

Hægt er að horfa á lengri útgáfu af matreiðslukennslunni á vef lambakjötsframleiðenda.

Reyndar hefði ég persónulega mælt með því að þeir settu uppskriftirnar á Youtube svo fólk eigi hægara með að deila þeim með öðrum.

En þessi markaðssetning fær samt í heildina toppeinkunn.

Gary Vaynerchuk er skemmtilegur

Hann er líka alvöru Social Media seleb. Búinn að mæta hjá Conan og Opruh.

Wipeout - Skjár Einn

Fórum í hópferð einn morguninn í vikunni að sjá fyrsta Wipe-out þáttinn þegar að hann var sýndur markaðsfólki í Smárabíó.

Það er enginn vafi á að þetta á eftir að verða mjög vinsælt sjónvarpsefni. Engin tilviljun að þetta skuli vera kóperað út um allan heim.

Formúlan er skotheld. Fólk að detta á rassinn.



Reyndar er Wipe-out byggður á blöndu úr ýmsum trylltum japönskum skemmtiþáttum. Og það er búið að taka "detta-á-rassinn" konseptið og víkka það hressilega út.

Formúlur eins og þessar virka bara betur ef eitthvað er í fámennu samfélagi eins og Íslandi þar sem allir þekkja alla.

Og það er nóg af augnablikum í Wipe-out þar sem hía má á landa sína.

Ég veit reyndar ekki hvort ég muni sjá fleiri þætti. Er ekki áskrifandi að Stöð 2.

P.s. Rikka stendur sig nokkuð vel sem spyrill.

---

Capacent er búið að kanna áhorf á sjónvarpsstöðvarnar og eins og við var búast þá minnkar áhorfið á Skjá einn mikið. Sjá nánar hér.

Mér skilst reyndar að þeir hafi líka lækkað auglýsingaverðið þannig að snertiverð auglýsinga sé enn nokkuð gott. Sérstaklega í kringum vinsæla þætti.

En samt. Á 20.000 áskrifenda læst sjónvarpsstöð framtíð sem auglýsingamiðill?

Vona að þetta gangi hjá þeim.

Skjár einn á sér nokkuð merkilega sögu. Leiðinlegt ef stöðin lognast út af.

Tímamótaauglýsing

Hér hefur áður verið minnst á hugmyndaauðgi apótekarans í Apóteki Vesturlands.

Auglýsingin frá honum á bls. 48 í Fréttablaðinu í dag markar að margra mati tímamót í markaðsmálum hérlendis.



Smellið tvisvar til að fá raunstærð.

Ósiður

Egill Einarsson, betur þekktur sem "Gillz" eða "Störe" hefur gefið út bók um mannasiði

Það er flott hjá honum.

Hann gerir sig hins vegar sekan um bölvaðan ósið í auglýsingagerð í kynningarborða fyrir bókina sem sjá má á Pressunni.

Það er það að setja punkt á eftir fyrirsögnum og stökum setningum.



Sveiattan bara!

Þessi punktur svíður enn meira í augu út af spegluninni sem Egill vill endilega setja á þetta.

Skora á hann að kippa þessu í liðinn.

Vinsælla en kók

Stefán Pálsson bloggaði um þennan eðaldrykk um daginn sem kallast IRN BRU og er vinsælasti gosdrykkurinn í Skotlandi. Vinsælli en Coca-Cola.



Einn vinnufélagi okkar hérna í Höfðabakkanum er nýkominn frá Glasgow og tók með sér sitt hvora flöskuna af IRN BRU og Diet IRN BRU.

---

Það var því heilög stund áðan þegar við skenktum í nokkur glös og brögðuðum á þessum guðaveigum.

Bragðið er... all sérstakt.

Vorum við öll sammála um að þetta væri drykkur sem þyrfti að venjast.

Hægt að nota vildarpunkta til að kaupa jólagjafir í gegnum netið

Ég hef stundum pirrað mig á því að hafa ekki getað nýtt vildarpunktana mína hjá Icelandair sem skyldi.

Þetta hefur verið svona upp og niður. Stundum finnst mér að ég ætti að eiga helling af punktum og á þá kannski í mesta lagi fyrir einni nótt á hóteli.

En stundum hefur punktastaðan komið mér þægilega á óvart og dugað fyrir 2-3 uppfærslum á betra farrými.



---

Eitt er ég þó nýbúinn að uppgötva. En það er að maður geti nýtt punktana til að versla vörur í gegnum netið.

Föt, bækur, rafmagnstæki. Allt er þetta hægt að kaupa fyrir vildarpunkta Icelandair, með því að skipta þeim fyrir punkta á bandaríska vefnum Points.com.

Síðan fer maður bara á Amazon.com, Toys.com og eða aðrar slíkar síður og nýtir punktana þar upp í topp.

---

Ég hef ekki séð þessa leið til að nýta vildarpunkta auglýsta og af samtölum mínum við fólk að dæma þá eru afar fáir sem vita af þessum möguleika.

Um að gera að nýta punktana til að kaupa jólagjafir í kreppunni. Þ.e.a.s. ef menn eru ekki á leiðinni út á næstunni.

Hefur barátta fyrir samkeppni neikvæð áhrif á vörumerki?

Kaupás hefur nýverið byrjað að láta framleiða fyrir sig sérmerktan Feta-ost í krukkum undir heitinu íslensk matvæli.

Innihaldið og krukkan virðist hins vegar vera sömu ættar og fetaosturinn frá Mjólku.

Það er bara límmiðinn sem er öðruvísi.



---

Ég stillti þessum tveimur krukkum upp hlið við hlið í Krónunni í Árbæ og ég verð að segja að Feta-osturinn sem seldur er undir vörumerkinu íslensk matvæli höfðaði mun betur til mín þar sem ég stóð þarna í búðinni.

Afhverju ætli það sé?

---

Er hugsanlegt að sú harða barátta sem Mjólka hefur háð fyrir eðlilegri samkeppni mjólkurframleiðenda undir forystu Ólafs Magnússonar hafi skapað vörum fyrirtækisins neikvæða ímynd?

Eru þetta réttu hugrenningatengslin fyrir matvælaframleiðslu?

Eða ætti frekar að reyna að tengja vörumerkin við orð eins og gæði, hreinleika, hefðir og þjóðrækni?

Eða er ég kannski einn um að telja að vörumerki Mjólku séu vitlaust skilgreind?

Hress bensínafgreiðslumaður

Þessi bensínafgreiðslumaður á N1 í Ártúnsbrekku er með þeim hressari í bransanum.



Alltaf kátur. Heilsar öllum með virktum. Finnst gaman í vinnunni.

---

Ég var þarna að kaupa gos og vatn fyrir skrifstofuna um daginn og hann hjálpaði mér að bera það allt út í bíl.

Sagði svo eins og alltaf "eigðu góðan dag" með sínum skemmtilega hreim.

Gaman að þessu.

Myndagetraun

Hvor myndin er tekin á íslenskri lögmannsstofu og hvor er frá nýjum höfuðstöðvum Twitter?